Spirit: Stallion Of The Cimarron - Movie Review (Click 06)

Click လုပ်ပေးတဲ့အတွက် ကျေးဇူးတင်ပါတယ်ခင်ဗျာ။

Clickers တို့ရေ... ၁၀ စက္ကန့်နေပြီးမှ ပြန်ထွက်ပေးပါနော။

အချိန် စ,မှတ်ပါပြီ။ 10

ပြန်ထွက်လို့ရပါပြီခင်ဗျာ။

    မနေ့က "Animation Movie လေး ညွှန်းပေးပါဦး" ဆိုတဲ့ comment လေးတစ်ခု တွေ့မိလို့ပါခင်ဗျာ။

    ဒီဇာတ်ကားလေးကို ကျွန်တော် သဘောကျမိတဲ့ အဓိကအချက် ၂ ချက် ရှိတယ်ခင်ဗျ။ တစ်ချက်က ဇာတ်လမ်းမှာ ပါတဲ့ သတ္တဝါတိုင်းဟာ သူ့ဘာသာဘာဝ ဘာသာစကားကိုပဲ ပြောတာရယ် နောက်တစ်ချက်က ဇာတ်ဝင်တေးရယ်ပါ။ ပထမတစ်ချက်ကို နားလည်အောင် ပြောရမယ်ဆိုရင် တခြား အကောင်လေးတွေအကြောင်း ရိုက်ထားတဲ့ ဇာတ်ကားတွေလိုမဟုတ်ဘဲ ဒီဇာတ်လမ်းမှာပါတဲ့ တိရိစ္ဆာန်တွေက လူစကား ထ,မပြောဘူးဗျာ။ အဓိကဇာတ်ကောင်ဖြစ်တဲ့ မြင်းဆို မြင်းလိုပဲ ဟီတယ်။ နောက် ငှက်ဆို ငှက်သံပဲ။ လူတွေကပဲ လူစကားပြောတာ။ ကုန်ကုန်ပြောရရင် Narrative တောင်မှ မြင်းလိုပဲ ဟီတယ်၊ ဟန်ပန်အမူအရာ ပြတယ်ခင်ဗျာ... အေးရော။ ဒီဇာတ်ကား အဓိကကြည့်ကောင်းသွားတဲ့အကြောင်းကလည်း အဲ့လိုသဘာဝကျအောင် လုပ်ထားလို့ဗျ။

    နောက်တစ်ချက်ဖြစ်တဲ့ ဇာတ်ဝင်တေး...၊ ဇာတ်လိုက်မြင်းစုံတွဲလေး သွားလာမြူးတူး၊ ရေကူးကြတဲ့အခန်းမှာ သုံးသွားတဲ့ ဇာတ်ဝင်တေးဆို ကျွန်တော် အတော်လေးကို သဘောကျတာခင်ဗျာ။ အဲ့ဇာတ်ကားလေး ကြည့်နေရင်းကို "ဟာ...သံစဉ်က မိုက်လှပါလား" ဆိုပြီး မျောသွားတာ။ ရယ်စရာတစ်ခု (အမှတ်တရပေါ့) ပြောပြရရင် ကျွန်တော်ငယ်ငယ် (အဲ့တုန်းက) သဘောကျရတဲ့ အမျိုးသမီးလေးအကြောင်း စိတ်ကူးယဉ်မိရင် အဲ့သံစဉ်လေးက ခေါင်းထဲမှာ အော်တိုမက်တစ်ကို ပေါ်လာတာခင်ဗျာ။ အဲ့လိုကို စွဲလန်းမိတာ (သံစဉ်..သံစဉ်) ။ နောက်အချိန်တစ်ခုရောက်မှာ ဒီသံစဉ် ဒီလောက်တောင်ကောင်းတာ ဘယ်သူ့လက်ရာပါလိမ့်လို့ ရှာကြည့်တော့မှ.. လား..လား... ဆရာကြီး Hans Zimmer ရဲ့ လက်ရာဖြစ်နေတာကိုးဗျ။ ဇာတ်ဝင်တေးလေး နာမည်က The Long Road Back တဲ့။

    ဒီဇာတ်ကားလေး ထွက်ခဲ့တာကတော့ ၂၀၀၂ ခုနှစ်ပါ။ ရိုက်ကူးရေး Budget $80 Million သုံးထားပြီး ရုံတင်ပြသငွေ $122 Million ပြန်လည်ရရှိခဲ့ပါတယ်။ Best Animated Feature အတွက် Nominate ဖြစ်ခဲ့ပေမယ့် Spirited Away Anime ကြောင့် ဆုကို လက်လွှတ်ခဲ့ရပါတယ်။ ဇာတ်အိမ်တည်ထားတာကတော့ အမေရိကန်ပြည်ထောင်စုကြီး ဖွံ့ဖြိုးရေးအတွက် မီးရထားလမ်းတွေ ဖောက်နေတဲ့အချိန်၊ Red Indian တွေနဲ့ အထိအတွေ့လေးတွေ ရှိနေတဲ့အချိန်ပါ။ အဓိကဇာတ်ကောင် Spirit က Kiger Mustang မြင်းရိုင်းတစ်ကောင်ပါ။ တစ်နေ့မှာတော့ အဲ့ဖက်ဒေသမှာ တာဝန်ကျနေတဲ့ ကာနယ်နဲ့ အဖွဲ့က Spirit ကို ဖမ်းမိသွားပါတယ်။ သူ့ကို ဖမ်းသွားတဲ့ စခန်းမှာ သူ့လိုပဲ အဖမ်းခံထားရတဲ့ Red Indian ကောင်လေးတစ်ယောက် ရှိနေပါတယ်။ ကာနယ်ရဲ့အမိန့်နဲ့ စခန်းမှာ ရှိသမျှလူတိုင်းဟာ Spirit ကို ယဉ်အောင်လုပ်ဖို့ ကြိုစားကြပေမယ့် အထမမြောက်ရှာပါဘူး။ တစ်ရက်မှာတော့ Red Indian ကောင်လေးနဲ့ Spirit ဟာ စခန်းကနေ ထွက်ပြေးနိုင်ခဲ့ကြပါတယ်။ အဲ့ဒီနောက်မှာတော့ Spirit တစ်ယောက် အချစ်နဲ့ စုံစည်းပုံ၊ သူနဲ့ Red Indian ကောင်လေးတို့ လွတ်လပ်မှုအတွက် အတိုင်အဖောက်ညီညီ စွမ်းဆောင်ကြပုံတွေကို ကြည့်ရမှာဖြစ်ပါတယ်။ ကိုယ့်လူတို့ ကိုယ်တိုင်ခံစားကြည့်လို့ရအောင် ဇာတ်လမ်းကို ပိုက်စိတ်တိုက် မပြောတော့ဘူးနော...။

    အချုပ်ပြောရရင်တော့ Freedom ဆိုတာ ကမ္ဘာမှာ နေထိုင်သမျှ သတ္တဝါအားလုံး၊ အရာအားလုံးအတွက် သူ့နည်းသူ့ဟန်နဲ့ လိုအပ်တယ်ဆိုတာ ဒီဇာတ်ကားလေးကို ကြည့်ရင်း အတွေးပေါက်ကြမှာပါ။ အာချောင်တာလည်း များသွားပြီဆိုတော့ အောက်မှာ Trailer လေး ထည့်ပေးထားပါ့မယ်ခင်ဗျာ။

မိတ်ဆွေတို့အားလုံး ဂရုစိုက်ကြပါခင်ဗျာ။