Goldfish Memory Lasts 3 Seconds - Myth Or Fact (Click 05)

Click လုပ်ပေးတဲ့အတွက် ကျေးဇူးတင်ပါတယ်ခင်ဗျာ။

Clickers တို့ရေ... ၁၀ စက္ကန့်နေပြီးမှ ပြန်ထွက်ပေးပါနော။

အချိန် စ,မှတ်ပါပြီ။ 10

ပြန်ထွက်လို့ရပါပြီခင်ဗျာ။

ရွှေငါးလေးတွေရဲ့ မှတ်ဉာဏ်ဟာ အချိန် ၃ စက္ကန့်ပဲ ခံပါတယ်
(ယုံတမ်းလား၊ အတည်လား?)

ရွှေငါးဆိုရင် လူတော်တော်များများ ပြေးမြင်ကြတာက ရွှေရောင်တောက်တောက်၊ မျက်လုံးပြူးပြူးနဲ့ မှတ်ဉာဏ်မကောင်းတဲ့ ကောင်းလေးတွေပေါ့ခင်ဗျာ။ လူပြောအများဆုံး ကိစ္စကတော့ ရွှေငါးလေးတွေရဲ့ မှတ်ဉာဏ်ဟာ အချိန် ၃ စက္ကန့်ပဲ ခံတယ်ဆိုတာပါ။ ဒါပေမယ့် အဲ့တာက သိပ္ပံနည်းကျ အဖြေမရှိတဲ့ ယုံတမ်းသက်သက်ပါခင်ဗျာ။

“ဘာလို့ ဒီလိုအတည်ပေါက်ကြီး ဖြစ်သွားရသလဲဆိုတော့ ကမ္ဘာ့ရဲ့ ဘယ်အရပ်ကိုသွားသွား လူတိုင်းနည်းပါးက ဒီလိုပဲ တစ်ပုံစံတည်း ပြောနေကြလို့ပါ” လို့ ဩစတေးလျနိုင်ငံ Macquarie University က ငါးကျွမ်းကျင်ပညာရှင် Culum Brown က ပြောထားပါတယ်။ တချို့တွေ ပြောကြတာဆို ၂ စက္ကန့်လောက်၊ တချို့ကျ ၁၀ စက္ကန့်၊ အဲ... တူတာတစ်ခုကတော့ မှတ်ဉာဏ်ကြာချိန် နည်းတယ်ဆိုတာပါပဲ။

တကယ့်တကယ်တမ်းမှာတော့ ရွှေငါး (Carassius auratus) တွေဟာ တာရှည်ခံတဲ့ မှတ်ဉာဏ် ပိုင်ဆိုင်ထားကြပါတယ်တဲ့။ ဘယ်လောက်ကြာကြသလဲဆို ရက်သတ္တပတ်တွေ၊ လတွေ၊ တချို့ကောင်လေးတွေဆို နှစ်နဲ့ချီပြီးကို မှတ်မိတတ်ကြပါသတဲ့ခင်ဗျာ။ ဒီတွေ့ရှိချက်ဟာ နှစ်ပေါင်း ၆၀ ကျော်လောက်တောင် ရှိပြီလို့ Brown က ပြောပါတယ်။ ရွှေငါးတွေမှာ အတော်အသင့်ကောင်းတဲ့ မှတ်ဉာဏ်ရှိတဲ့အကြောင်း ၁၉၅၀-၆၀ လောက်ကတည်းက သိထားခဲ့ကြပါတယ်တဲ့။ ဆိုတော့ လူတွေ ထင်နေကြသလိုမဟုတ်ဘဲ သူတို့လေးတွေဟာ တကယ်ပဲ မှတ်ဉာဏ်ကောင်းကြပါသတဲ့ခင်ဗျာ။

Brown ဟာ ရွှေငါးအပါအဝင် ငါးတွေရဲ့ မှတ်ဉာဏ်ကို အချိန် ၂၅ နှစ်ကျော်ကြာ လေ့လာခဲ့တာပါ။ ဒီလို အထင်အမြင်လွဲရခြင်းရဲ့ အကြောင်းကတော့ ငါးတွေရဲ့ အသိဉာဏ်ကို မသိကျိုးကျွံ ပြုကြတာရယ်၊ ငါးလေးတွေနဲ့ ဖက်လဲတကင်း သိပ်မနေဖြစ်ကြတာရယ်ကြောင့်ပါတဲ့။ ဘာလို့ဆို ငါးပိုင်ရှင်တော်တော်များများက ငါးလေးတွေကို ခပ်သေးသေး ကန်တွေလောက်နဲ့ပဲ မွေးဖြစ်ကြတာကြောင့်ပါ။

တကယ်တော့ ရွှေငါးလေးတွေဟာ အံ့အားသင့်ဖို့ကောင်းတဲ့ မှတ်ဉာဏ် ပိုင်ဆိုင်ထားကြပါသတဲ့ခင်ဗျာ။ Brown တို့ဟာ စမ်းသပ်ပစ္စည်းလေးတွေနဲ့ ငါးတွေရဲ့ မှတ်ဉာဏ်ကို လေ့လာခဲ့ကြပါတယ်တဲ့။ ရွှေငါးလေးတွေကို အကြိမ်ရေ ထောင်နဲ့ချီပြီး စမ်းသပ်အပြီးမှာ ရလာတဲ့ အဖြေကတော့ သူတို့လေးတွေဟာ အတော်ကိုကောင်းတဲ့ မှတ်ဉာဏ်ရှိကြပါသတဲ့ခင်ဗျာ။ အဓိက စမ်းသပ်ပစ္စည်းကတော့ အစာပါ။ ရွှေငါးလေးတွေကို ကန်ရဲ့တစ်ဖက်ခြမ်းမှာပဲ အစာချပေးတယ်ဆိုရင် အချိန်တိုအတွင်းမှာပဲ ဆရာသမားတွေဟာ အစာကျွေးချိန်ရောက်တိုင်း အဲ့ဖက်အခြမ်းမှာပဲ နေရမယ်ဆိုတာ သိသွားကြပါသတဲ့ခင်ဗျာ။ အစာကျွေးချိန်ရောက်လို့ အစာမကျွေးသေးဘူးဆိုရင်တောင် အဲ့ဖက်မှာ သွားနေနေကြတာတဲ့နော်၊ တကယ့်ဟာလေးတွေ။ နောက်တစ်နည်း စမ်းတာကကျ အနီရောင် အပြားလေးနဲ့ အပြာရောင် အပြားလေးကို ကန်ထဲမှာ ထည့်ထားမယ်။ အနီပြား လာတို့တဲ့ကောင်ကို အစာကျွေးပြီး၊ အပြာပြား လာတို့ရင် မကျွေးဘူးပေါ့။ အဲ့လိုဆိုရင်လည်း ဆရာသမားတွေက မှတ်ထားပြီး အနီပြားပဲ လာတို့ကြတာတဲ့ဗျို့။ ဒီလို စမ်းသပ်နည်းတွေမျိုး တခြားနည်းတွေ အများကြီး (ဥပမာ ရေပူပေါင်းတို့ဘာတို့ပေါ့) နဲ့လည်း စမ်းသပ်ပါသေးတယ်တဲ့။ အဲ... သီချင်းနဲ့တောင် စမ်းသေးသတဲ့ခင်ဗျ။

ရွှေငါးလေးတွေဟာ ပြဿနာ ဖြေရှင်းတဲ့နေရာမှလည်း တော်ကြပါတယ်တဲ့။ သူတို့ကို ပိုက်ကွန်ကနေ လွတ်အောင်ပြေးနည်းတို့၊ ဝင်္ကပါကနေ ထွက်နည်းတို့လည်း သင်ပေးဖူးတယ်လို့ Brown က ပြောပါတယ်။ အဲ့လိုလုပ်ရတာတွေကို ဆရာသမားလေးတွေက ရက်သတ္တပတ်ချီ၊ လနဲ့ချီပြီးတော့ကို မှတ်မိကြပါသတဲ့ခင်ဗျာ။ တခြားသက်သေသာဓကတွေ ပြောရရင်တော့ ရွှေငါးလေးတွေဟာ အချိန်အကြာကြီး ခွဲရရင်တောင် ဘယ်သူဘယ်ဝါဆိုတော့ မှတ်မိနိုင်ကြပါတယ်တဲ့။ အဲ့အချက်ကို ပြန်ရှင်းရရင် ဘယ်လိုလဲဆိုတော့... တချို့ပိုင်ရှင်တွေ ပြောကြတာမှာ သူတို့ရွှေငါးလေးတွေဟာ လူတွေအများကြီး ကြားထဲကနေတောင် သူတို့ကို သေချာခွဲခွဲခြားခြား သိကြပါသတဲ့ခင်ဗျာ။

ရွှေငါးတစ်ကောင်ရဲ့ မှတ်ဉာဏ်ကြာချိန်ကို တိတိပပ ပြောစမ်းဆိုရင် ပြောရခက်ပါလိမ့်မယ်။ ဘာလို့ဆို ထူးခြားတဲ့ အမှတ်တရတွေက ပုံမှန်အမှတ်တရတွေထက် ပိုပြီး သိသိသာသာ ရှိတတ်လို့ပါ။  ကျွန်တော်တို့ လူသားတွေမှာဆိုရင်လည်း သာမန် သူလိုငါလို အဖြစ်အပျက်ထက် ကြောက်ဖို့ကောင်းတဲ့ အဖြစ်အပျက်ကိုမှ ပိုမှတ်မိတတ်ကြတာပဲလေဗျာ...နော။ ဒါပေမယ့် တစ်ယောက်ယောက်က ရွှေငါးလေးတွေရဲ့ မှတ်ဉာဏ်က အချိန် ၃ စက္ကန့်ပဲ ခံတယ်လို့ ရွှီးလာခဲ့ရင် ကိုယ့်လူအနေနဲ့ ရက်တွေ၊ လတွေ၊ နှစ်တွေနဲ့ ချီပြီး မပြောချင်ရင်တောင် ရွှေငါးလေးတွေရဲ့ မှတ်ဉာဏ်ဟာ ၃ စက္ကန့်ထက် ပိုကြာကြောင်း ရဲရဲကြီး ပြောလိုက်လို့ ရပါတယ်ခင်ဗျာ။

C2D

ကိုးကား။ ။ Live Science

မိတ်ဆွေတို့အားလုံး ဂရုစိုက်ကြပါခင်ဗျာ။