Dogs are color-blind (Myth or Fact)

Click လုပ်ပေးတဲ့အတွက် ကျေးဇူးတင်ပါတယ်ခင်ဗျာ။

Clickers တို့ရေ... ၁၀ စက္ကန့်နေပြီးမှ ပြန်ထွက်ပေးပါနော။

အချိန် စ,မှတ်ပါပြီ။ 10

ပြန်ထွက်လို့ရပါပြီခင်ဗျာ။

ခွေးလေးတွေဟာ အရောင်မခွဲခြားနိုင်ဘူးဆိုတာ

ယုံတမ်းလား... အတည်လား?

    ကိုယ့်လူတို့ ခွေးလေးတွေအကြောင်း ရိုက်ထားတဲ့ ရုပ်ရှင်တို့၊ ခွေးလေးတွေပါတဲ့ ရုပ်ရှင်တို့ကို ကြည့်ရင်သတိထားမိကြပါလိမ့်မယ်။ ခွေးလေးတွေက လှမ်းကြည့်တဲ့ ဇာတ်ဝင်ခန်းဆို သူတို့ဖက်က မြင်ရတဲ့အမြင်ကို အဖြူ၊ အမည်းနဲ့ ပြပေးတာမျိုးလေ။ ဆိုတော့ တကယ့်တကယ် လက်တွေ့မှာရော ခွေးတွေရဲ့ အမြင်အာရုံက အဲ့ဒီအတိုင်းပဲလား? လူသားတွေရဲ့ အကောင်းဆုံး မိတ်ဆွေလေးတွေဟာ တကယ်ပဲ အရောင်မခွဲခြားနိုင်ကြရှာဘူးလား?

        ပြောရရင် ရုပ်ရှင်တွေမှာပါတဲ့ အဖြူ၊ အမည်း ပြကွက်တွေဟာ လုံးဝကို မှားပါတယ်။ ခွေးတွေဟာ အဖြူနဲ့ အမည်း ၂ ရောင်တည်းကိုပဲ မြင်နိုင်တာ မဟုတ်ပါဘူး။ ဒါပေမယ့် နားလည်အောင် အရှင်းဆုံး ပြောပြပေးရရင်တော့ လူသားတွေအခေါ် အရောင်မခွဲခြားနိုင်တာ (Color-Blind) ပေါ့ခင်ဗျာ။ ဘာလို့လဲဆိုတော့ ခွေးတွေရဲ့ မျက်လုံးထဲမှာ Cone လို့ခေါ်တဲ့ အရောင်အာရုံခံ ဆဲလ်လေး ၂ ခုပဲ ပါတာကြောင့်ပါ။ ဒါပေမယ့် ကျွန်တော်တို့ လူသားတွေမှာတော့ ၃ ခုပါပါတယ်။ လူတွေ အရောင်မခွဲခြားနိုင်တာ ဘာကြောင့်လဲဆိုရင်တော့ ခုနကပြောသွားတဲ့ ဆဲလ် ၃ ခုမှာ ၁ ခုက ကောင်းကောင်း အလုပ်မလုပ်နိုင်တော့တာကြောင့်ပါ။ အဲ့ဒီဖြစ်စဉ်ကို အရောင် ၂ ခုသာ မြင်နိုင်ခြင်း (Dichromacy) လို့ ခေါ်ပါတယ်။ ခွေးတွေရဲ့ အရောင်မခွဲခြားနိုင်မှုကလည်း အဲ့သဘောတရားပါပဲ။ ဆိုတော့... လူသားတွေ နားလည်နိုင်မယ့် စကားလုံးနဲ့ ပြောရမယ်ဆိုရင် ခွေးလေးတွေဟာ အရောင်မခွဲခြားနိုင်ကြပါဘူးခင်ဗျာ။

        ဒီလိုဆိုတော့ ခွေးလေးတွေက ဘာအရောင်တွေ မြင်နိုင်ကြတာလဲပေါ့။ မျက်လုံးမှာပါတဲ့ အရောင်အာရုံခံဆဲလ် ဆိုတာလေးတွေက အလင်းအလျားရဲ့ ပမာဏတစ်ခုကို ဖမ်းယူပြီး အလုပ်လုပ်ကြတာပါ။ လူတွေမှာဆိုရင်တော့ အနီ၊ အစိမ်း၊ အပြာဆိုတဲ့ အခြေခံအရောင်တွေကို ဖမ်းယူကြပါတယ်။ ပြီးမှ အဲ့အရောင်တွေကို ဟိုစပ်ဒီစပ်လုပ်ရင်း လက်ရှိ ကျွန်တော်တို့ မြင်နေရတဲ့ အရောင်မျိုးစုံအဖြစ် ဦးနှောက်ကို သတင်းပို့ပေးကြတာပါ။ ခွေးလေးတွေကျ သူတို့မှာပါတဲ့ ဆဲလ် ၂ ခုက အပြာနဲ့ အဝါကိုပဲ ဖမ်းယူနိုင်ပါတယ်။ သဘောက အပြာရောင်၊ အဝါရောင်နဲ့ အဲ့ ၂ ရောင်ကို စပ်လို့ ပေါ်လာမယ့် အရောင်တွေပေါ့။ အဲ့တာတွေကိုပဲ ခွေးလေးတွေ မြင်နိုင်စွမ်း ရှိကြတာပါ။ ဒါကြောင့် အနီရောင်ဆိုရင် ဝါညိုညိုအရောင်အဖြစ် မြင်ရမှာဖြစ်ပြီး၊ အစိမ်းရောင်ဆိုရင်လည်း အစိမ်းတောက်တောက် အရောင်မျိုး မမြင်ရဘဲ ခပ်မှိုင်းမှိုင်း စိမ်းဝါဝါအရောင် အဖြစ်ပဲ မြင်ရမှာပါ။

        ကဲ ခွေးလေးတွေ မြင်နိုင်မယ့် အရောင်လေးတွေကို သိသွားပြီဆိုတော့ သူတို့အတွက် အရုပ်တွေ၊ အင်္ကျီတွေ၊ တခြားအသုံးအဆောင်တွေ ဝယ်ပေးတော့မယ်ဆိုရင် သူတို့ကြိုက်တတ်မယ့် အရောင်လေးတွေ ရွေးတတ်သွားလောက်ပြီ ထင်ပါတယ်။ ကိုယ့်လူတို့ သတိထားမိမှာပါ။ ခွေးလေးတွေက ဘောလုံးဆိုရင် အစိမ်းနဲ့ အဝါ စပ်ထားတဲ့ တင်းနစ်ဘောလုံးကို အသားကုန် သဘောကျတတ်တာလေ။ အကြောင်းကတော့ ရှင်းသွားပါပြီ။ တင်းနစ်ဘောလုံးက သူတို့ကောင်းကောင်းမြင်နိုင်တဲ့ အရောင်မျိုး ဖြစ်နေတာကြောင့်ပါ။

        ပြောရမယ့် ကိစ္စက လာပြီ။ ကိုယ့်လူတို့ ဝယ်ပေးထားမိတဲ့ အရုပ်တို့ ဘောလုံးတို့က အနီရောင်၊ ပန်းရောင်လို တစ်ခုခု ဖြစ်နေတယ်ဆိုရင်တော့ မြက်ခင်းစိမ်းထဲတို့ ဒါမှမဟုတ် တခြားအစိမ်းရောင်များတဲ့ နေရာမျိုးမှာ ပစ်တိုင်း၊ ဖမ်းတိုင်း သွားဆော့ချင်လို့ မရပါဘူး။ ဆရာသမားလေးတွေခမြာ ကောက်ရိုးပုံထဲ အပ်ပျောက်ရှာရသလို ဒေါင်ချာစိုင်းသွားကြပါလိမ့်မယ်။ အဲ့တာကိုမှ “ငါ ဘောလုံး ပစ်ပေးတာကို ဘာလို့သွားမကောက်တာလဲ? သူများကလေးတွေဆို လိမ္မာချက်၊ တန်းကောက်ပေးတာ.. ဘာညာ” အဲ့လိုမျိုးတွေ သွားမပြောမိပါစေနဲ့ခင်ဗျာ။ သူတို့ ဝမ်းနည်းသွားကြပါလိမ့်မယ်။ ကိုယ့်လူ ပစ်လိုက်တဲ့ ဘောလုံး၊ အရုပ်အရောင်ကို သူတို့မှ ကောင်းကောင်းမမြင်နိုင်ရှာတာကိုးဗျ။

ဝဲဖက် - သာမန်လူမျက်လုံးဖြင့် မြင်ရမည့်ပုံ၊ ယာဖက် - ခွေးလေးများ ကြည့်လျှင် မြင်ရမည့်ပုံ

        ဒါပေမယ့်ဗျာ... တကယ့်ဂွတီးဂွကျနိုင်တဲ့ ကိစ္စကို ပြောရမယ်ဆိုရင် အဝယ်အလိုက်ဆုံး ခွေးကစားစရာ အရုပ်တွေရဲ့ အရောင်က အနီရောင်နဲ့ လိမ္မော်ရောင်တဲ့ခင်ဗျာ။ ခွေးလေးတွေအနေနဲ့ ဘယ်လိုမှ ကောင်းကောင်းမမြင်နိုင်တဲ့ အရောင် ၂ မျိုး။ ဆိုတော့ ကိုယ်ဝယ်ထားမိတဲ့ ပစ္စည်းလေးတွေက အနီရောင်၊ ပန်းရောင်၊ လိမ္မော်ရောင်တွေ ဖြစ်နေလို့လည်း ဝမ်းနည်းမသွားကြပါနဲ့ခင်ဗျာ။ တစ်ကမ္ဘာလုံး ကိုယ်လိုသူလို လူတွေချည်းပါပဲ။ ဘယ်အကုန် သိနိုင်ပါ့မတုန်း၊ နော..? အဲ့ဒီတော့ ဒီဆောင်းပါးလေး ဖတ်ပြီးတဲ့နောက် ဝယ်ဖြစ်တဲ့ ပစ္စည်းလေးတွေကျမှ သေချာရွေးဝယ်ပေးကြပေါ့ခင်ဗျာ။

C2D

ကိုးကား : American Kennel Club, Britannica.

မိတ်ဆွေတို့အားလုံး ဂရုစိုက်ကြပါခင်ဗျာ။