Cat can see in Total Darkness (Myth or Fact)

Click လုပ်ပေးတဲ့အတွက် ကျေးဇူးတင်ပါတယ်ခင်ဗျာ။

Clickers တို့ရေ... ၁၀ စက္ကန့်နေပြီးမှ ပြန်ထွက်ပေးပါနော။

အချိန် စ,မှတ်ပါပြီ။ 10

ပြန်ထွက်လို့ရပါပြီခင်ဗျာ။

ကြောင်လေးတွေဟာ အမှောင်ထဲမှာ ကောင်းကောင်းနိုင်မြင်တယ်ဆိုတာ
ယုံတမ်းလား၊ အတည်လား?

        လိုရင်းတိုရှင်း ပြောရရင်တော့ ကြောင်လေးတွေ အမှောင်ထဲမှာ မြင်ရတယ်ဆိုတာ အဲ့လောက်ကြီး မဟုတ်ပါဘူး။ ဒါပေမယ့်လည်း အိမ်မှာ ကြောင်လေး မွေးထားသူတိုင်း ကြုံရမယ့်အရာကတော့ ညကြီးအချိန်မတော် ဂလုံးဂလွမ် အသံတွေ၊ ခြေဖဝါးသေးသေးလေးတွေနဲ့ တဖွဖွ ပြေးသွားတဲ့ အသံလေးတွေကို ကြားရမှာပါ။ ဒီတော့လည်း အားလုံး တွေးမိမှာက ကြောင်တွေမှာ ညဖက်ကြည့်နိုင်တဲ့ အမြင်စွမ်းအားမျိုး ရှိလောက်တယ်ပေါ့။ တကယ်တမ်း ညကြီးအချိန်မတော် အဲ့လိုကမျဉ်းကြောထဖို့ သူတို့လည်း အလင်းအားလေး မဆိုသလောက် လိုပါသေးတယ်ခင်ဗျ။ ဘယ်လောက်လဲဆိုတော့ ည လင်းအားနည်းတဲ့အချိန် မြင်ရဖို့ လူတွေ လိုအပ်တဲ့ အလင်းရဲ့ ၆ ပုံ ၁ ပုံလောက်ပါ။ ဘာအလင်းတစ်စက်မှ မကျနိုင်တဲ့ အလုံပိတ်ခန်းထဲ ထည့်လိုက်မယ်ဆိုရင် သူတို့လည်း ဘာမှမမြင်ရပါဘူး။

        Catster Website ရဲ့ ဖော်ပြချက်အရ ကြောင်လေးတွေ ညဖက်အမြင် ကောင်းရခြင်းရဲ့ အကြောင်းအရင်းက သူတို့မျက်လုံးရဲ့ ဖွဲ့စည်းပုံကြောင့်ပါ။ သူတို့လေးတွေရဲ့ မျက်လုံးမှာ ခပ်ခုံးခုံး မျက်ကြည်လွှာနဲ့ တော်တော်ကြီးတဲ့ မျက်တွင်းမှန် (မှန်ဘီလူးမျိုး) ပါပါတယ်။ လင်းအားနည်းတဲ့ အချိန်မျိုးမှာဆိုရင်တောင် သူငယ်အိမ်ကို တစ်ပတ်အပြည့်လှည့်ပြီး အလင်း ရနိုင်သမျှရအောင် ဖမ်းယူနိုင်ပါသတဲ့ဗျာ။ အဲ့ဒီမှာ ထုံးစံအတိုင်း အလင်း၊ အရောင်၊ မြင်နိုင်စွမ်းတွေနဲ့ ပတ်သက်ရင် မပါမဖြစ် Rod နဲ့ Cone ဆဲလ်တွေဆီ ဘူတာဆိုက်ပါပြီ။ Rod ဆဲလ်လေးတွေက ညဖက်အမြင်တို့၊ မျက်လုံး ထောင့်ကပ်ကြည့်တာတို့၊ လှုပ်ရှားမှု အာရုံခံတာတို့အတွက် အလုပ်လုပ်ပြီး Cone ဆဲလ်လေးတွေကတော့ အရင်အခေါက်တွေမှာ ရှင်းပြခဲ့တဲ့အတိုင်း အရောင်တွေ မြင်နိုင်ဖို့နဲ့ နေ့အလင်းဖက်မှာ မြင်ရဖို့အတွက် အလုပ်လုပ်ပါတယ်။ အဲ့ဒီမှာ ဘာကွာသွားလဲဆိုတော့ ကြောင်လေးတွေမှာ Rod ဆဲလ် ပါတာများပြီး လူတွေမှာတော့ Cone ဆဲလ် အပြည့်အစုံ ပါပါတယ်။ Rod ဆဲလ် ပါတာများတဲ့အတွက် ကြောင်တွေဟာ အလင်းဖျဖျလေးပဲ ရှိနေရင်တောင် ကောင်းကောင်းမြင်နိုင်တာပါ။ ဒါပေမယ့် နေ့ဖက်မှာ မြင်ရသလောက်တော့ ထင်ထင်ရှားရှားကြီး မဖြစ်ဘူးပေါ့ခင်ဗျာ။

Cat Eye Anatomy (Cat-World.com)

        အဲ့ဒီအချက်တွေအပြင် ကြောင်တွေရဲ့ မျက်လုံးထဲမှာ Tapetum ခေါ်တဲ့ အရောင်ပြန်နိုင်တဲ့ တစ်ရှူးအလွှာလေး ပါပါသေးတယ်။ သူက ဘယ်လိုစွမ်းသလဲဆိုတော့ မျက်လုံးထဲဝင်လာတဲ့ အလင်းရဲ့ ၅၀ % နဲ့အထက်ကို အမြင်အာရုံကြောဆီ တစ်ဆင့်ခံ အရောင်ပြန်ပေးတာပါ။ ကျွန်တော်တို့တွေ ကြောင်တွေရဲ့ မျက်လုံးကို ဓါတ်မီးနဲ့ ထိုးလိုက်တာတို့၊ Flash ဖွင့်ပြီး ဓါတ်ပုံရိုက်လိုက်တာတို့ လုပ်တဲ့အခါ သူတို့မျက်လုံးတွေ လင်းသွားရတဲ့ အကြောင်းအရင်းက အဲ့ဒီ ရောင်ပြန်တစ်ရှူး (Tapetum) ကြောင့်ပါပဲ။ အဲ့ဒီ အရောင်ပြန်တစ်ရှူးက အာဝုတို့ အပါအဝင် ကျန်တဲ့အကောင်လေးတွေ တော်တော်များများမှာလည်း ပါပါတယ်။ လူတွေရဲ့မျက်လုံးလည်း Flash  ဖွင့်ရိုက်လိုက်ရင် အရောင်ပြန်တာပဲလေလို့ စောဒက တက်စရာ ရှိပါလိမ့်မယ်။ ဟုတ်ကဲ့၊ အရောင်ပြန်တာပါခင်ဗျာ။ လင်းတာမဟုတ်ပါဘူး။ မယုံရင် ကိုယ့်လူတို့ မျက်လုံးကို ဓါတ်မီးနဲ့ ထိုးကြည့်လိုက်ပါ။ အထိုးခံရတဲ့သူ မျက်စိစူးသွားတာပဲ ရှိပါလိမ့်မယ်။ မျက်လုံး လင်းလာတာမျိုးတော့ တွေ့ရမှာ မဟုတ်ပါဘူး။ မလင်းဆို ကျွန်တော်တို့ မျက်လုံးမှာ Tapetum မှ မပါဘဲကိုးဗျ။

ကြောင်လေးတွေရဲ့ သူငယ်အိမ် နေ့ဖက်နဲ့ ညဖက် ကွာခြားပုံ

        များသောအားဖြင့် ကြောင်လေးတွေရဲ့ သူငယ်အိမ်ဟာ နေ့ဖက်တွေဆို ဒေါင်လိုက်လေးဖြစ်နေပြီး သူတို့ တစ်ခုခု လိုချင်တဲ့အချိန်တို့၊ ညဖက်တို့ဆို ခပ်ဝိုင်းဝိုင်းလေး ဖြစ်သွားတာကို သတိထားမိကြမယ် ထင်ပါတယ်။ ကယ်လ်ဖိုးနီးယားတက္ကသိုလ်ရဲ့ ၂၀၁၅ ခုနှစ်က ပြုစုထားတဲ့ စာတမ်းမှာ ဖော်ပြထားတာကတော့ ကြောင်တွေရဲ့ သူငယ်အိမ် ပန်းကန်ပြားလို ဝိုင်းသွားရင် သူတို့မျက်လုံးထဲကို အလင်းဝင်ရောက်နိုင်မှု ပိုအားကောင်းသွားပါတယ်တဲ့။ ဆိုတော့... ခပ်မှိန်မှိန် အလင်းရောင်ပဲ ရှိရင်တောင် မြင်ရမယ်ပေါ့ဗျာ။ ဒါပေမယ့် ဝါးတားတားပဲ မြင်ရမှာပါ။

မြောင် အဝေးမှုန်သဖြင့် အနီးကပ် စိုက်ကြည့်နေရပုံ

        ကြောင်လေးတွေရဲ့ ညဖက်မြင်နိုင်စွမ်းဟာ ကျွန်တော်တို့ လူသားတွေထက် ပိုသာတယ် ဆိုပေမယ့် ဆရာသမားလေးတွေက အဝေးမှုန်ပါတဲ့ခင်ဗျာ။ ကြောင်တွေအနေနဲ့ အနီးကပ်ကြည့်မှ တိတိကျကျ မြင်ရမယ့်အရာမျိုးကို လူတွေက ၅ ဆလောက် ဝေးတဲ့နေရာကနေ လှမ်းကြည့်ရင်တောင် အေးဆေးမြင်နိုင်ပါတယ်။ စိတ်ပါရင် အိမ်မှာရှိတဲ့ မြောင်တွေနဲ့ ဂျပွန်ခြောက်ကြေး လောင်းပြီး ပြိုင်ကြည့်ကြပေါ့နော။ အဝေးမှုန်ဆိုပေမယ့် သူတို့ရဲ့ မြင်နိုင်စွမ်းအကျယ်ဟာ ၂၀၀ ဒီဂရီအထိ ရှိပါတယ်။ ကျွန်တော်တို့တွေကတော့ သိတဲ့အတိုင်း ၁၈၀ ဒီဂရီပဲ မြင်နိုင်တာပါ။ မြင်သာအောင်ပြောရရင် ခုခေတ် စမတ်ဖုန်းတွေမှာပါတဲ့ Wide Lens သဘောပါ။ ဆိုတော့ ဆရာသမားတွေရဲ့ဘေးက ဖြတ်သွားလည်း ရိပ်ကနဲ လှမ်းမြင်နိုင်တယ်ပေါ့ခင်ဗျာ။

    အနှစ်ချုပ်ရရင်တော့ ကြောင်လေးတွေ အမှောင်ထဲမှာ ကောင်းကောင်းမြင်နိုင်လားဆို မမြင်နိုင်ပါဘူး။ အလင်းရောင်လေး တစ်စိုးတစ်စတော့ ရှိနေမှ ရပါမယ်။ အဲ့လိုမဟုတ်ဘဲ လုံးဝအလုံပိတ်၊ အမှောင်အတိ ဆိုရင်တော့ သူတို့လည်း ဘာမှမြင်ရမှာ မဟုတ်တော့ပါဘူးခင်ဗျာ။

မိတ်ဆွေတို့အားလုံး ဂရုစိုက်ကြပါခင်ဗျာ။